Kudhaa oo dib ugu soo laabatay gacanta Jubbaland kaddib qabsashadii AS

Kismaayo, 22 Janaayo 2026 (Dawan)— Ciidamada Jubbaland, oo ay weheliyaan kuwa gaarka ah ee Kumaandooska Danab, ayaa dib u qabsaday magaalada xeebeedka Kudhaa ee degmada Badhaadhe, kadib markii ay shalay kooxda Al-Shabaab qabsadeen, sida ay sheegeen mas’uuliyiinta Jubbaland.

Sida lagu sheegay qoraal lagu daabacay warbaahinta Jubbaland TV, ciidamadu waxay magaalada ka soo galeen dhowr jiho subaxnimadii hore ee Khamiista, iyaga oo gudaha u galay, kuna go’doomiyay xubno ka tirsan Al-Shabaab, kuwaas oo qaar ka mid ah ay isa soo dhiibeen.

Wasiirka Warfaafinta, Dhaqanka iyo Dalxiiska ee Jubbaland, Cabdi Fataax Maxamed Mukhtaar, ayaa ku qoray bartiisa Twitter-ka: “ Ciidamada Jubbaland ayaa si buuxda gacanta ugu dhigay aagga xeebeedka Kudhaa kadib weerarkii Al-Shabaab shalay,” isaga oo u hambalyeeyay ciidamada dadaalka weyn ee ay sameeyeen.

Dib u qabsashadan ayaa timid kaddib hal maaalin oo dagaal ah, iyada oo shalay ay sheegatay Al-Shabaab inay qabsadeen Kudhaa oo ah aag istiraatiiji ah kana tirsan degmada Badhaadhe ee gobolka Jubbada Hoose.