Kuwait oo taageero buuxda u muujisay Midnimada Soomaaliya

Kuwait, 27 Diseembar 2025 ( Dawan)– Wasaaradda Arrimaha Dibadda ee Kuwait ayaa muujisay taageerada buuxda ee ay u hayso midnimada iyo madax-bannaanida Jamhuuriyadda Federaalka Soomaaliya, iyadoo si cad u diidday wararka ku saabsan aqoonsiga labada dhinac ee Israa’iil iyo Somaliland.

Bayaanka rasmi ah ee Wasaaradda oo la soo saaray maanta oo Sabti ah yaa lagu sheegay in tallaabadan ay tahay mid hal dhinac ah oo ka hor imaanaysa sharciga caalamiga ah, isla markaana qalqal gelinaysa ixtiraamka madax-bannaanida dowladaha iyo midnimada dhuleed.

Kuwait ayaa ku adkaysatay mowqifkeeda adag ee taageerada madax-bannaanida Soomaaliya, iyada oo diidan wax tallaabo ah oo khatar gelin karta midnimada dalka ama sharcinimada dowladda, isla markaana muujisay taageerada joogtada ah ee hay’adaha sharci ee Soomaaliya, iyada oo raacaysa sharciga caalamiga ah iyo mabda’a aan faragelin lagu sameyn arrimaha gudaha ee dowladaha.

Wasaaradda ayaa intaa ku dartay in Kuwait ay sii wadi doonto taageerada iyo dadaallada lagu xoojinayo xasilloonida iyo midnimada Soomaaliya, iyada oo ka duuleysa mowqifkeeda joogtada ah ee ilaalinta nabadda iyo ammaanka gobolka.