Garissa – 5 Janaayo 2026 (Dawan)- Laba qof ayaa ku dhintay shil gaari oo halis ah kadib markii bas rakaab ah oo ka yimid Nairobi kuna sii jeeday Mandheera uu ku dhacay gaari xamuul ah xilli uu marayay waddada u dhexeysa Garissa iyo Modogashe, gaar ahaan deegaanka Baraki, sida ay sheegeen ilo maxalli ah.
Shilka ayaa dhacay fiidnimadii Axadda abaare 9:00 fiidnimo, wuxuuna argagax iyo murugo ku abuuray dadka safarka ku marayay waddadan oo ah marin muhiim ah oo isku xirta waqooyiga Kenya iyo caasimadda Nairobi, isla markaana ay adeegsadaan dadka u socda magaalooyinka Wajeer iyo Mandheera.
Wararka hordhaca ah ayaa sheegaya in gaariga xamuulka ah uu taagnaa waddada, isla markaana uusan si cad u muuqan xilliga shilka, taas oo sababtay in basku si toos ah ugu dhacay, taas oo dhalisay khasaare nafeed.
Ilo ku sugan goobta ayaa xaqiijiyay in darawalkii gaariga xamuulka iyo mid ka mid ah kaaliyaashiisa in ay ku dhinteen goobta shilka.
