Baydhabo (Dawan)— Madaxweynihii hore ee Koofur-galbeed Cabdicasiis Lafta-gareen ayaa sheegay in ciidamo isaga taabacsan ay fuliyeen weerarkii shalay ka dhacay magaalada Baydhabo, kaas oo Dowladda Federaalka Soomaaliya ay sheegtay inay ku dishay ku dhowaad 30 dagaalyahan, tiro kalena ay gacanta ku dhigtay.
Lafta-gareen ayaa dhacdada ku tilmaamay “howlgal” lagu sugayay amniga iyo xasilloonida magaalada, halka Dowladda Federaalka ay ku sheegtay weerar ay si wadajir ah u qaadeen ciidamo isaga taabacsan iyo kuwo ka tirsan Al-Shabaab.
Lafta-gareen ayaa qoraal uu soo saaray ku bogaadiyay ciidamadiisa, isagoo sheegay in howlgalka 17-ka Agoosto laga fuliyay Baydhabo uu ujeeddadiisu ahayd “sugidda amniga, soo celinta xasilloonida iyo kala dambeynta.”
Afhayeenka Wasaaradda Gaashaandhigga Soomaaliya, Maxamed Cabdullaahi Shillaawe, ayaa sheegay in weerarka lagu soo qaaday Baydhabo uu ku billowday laba gaari oo walxaha qarxa laga soo buuxiyay, kuwaas oo sida uu sheegay loogu talagalay in lagu carqaladeeyo amniga magaalada.
