Lubnaan, Morocco iyo Comoros oo mowqif mideysan ka qaatay aqoonsiga Somaliland

Dhankeeda, Dowladda Midowga Jasiiradaha Comoros ayaa xaqiijisay mowqifkeeda adag ee ay ku taageerayso Jamhuuriyadda Federaalka Soomaaliya, iyadoo si buuxda u diiday isku day kasta oo lagu dhaawacayo midnimada dhuleed ee dalka ama lagu sharciyeynayo waxay ay ku magacaawday gooni-u-goosad. Comoros waxay aqoonsiga Israa’iil ku tilmaantay mid sharci-darro ah oo khatar toos ah ku ah amniga iyo xasilloonida Geeska Afrika, waxayna ugu baaqday beesha caalamka in ay gutaan waajibaadkooda ku aaddan ilaalinta madax-bannaanida Soomaaliya iyo xoojinta nabadda gobolka.

Sidoo kale, Boqortooyada Morocco ayaa si aan gambasho lahayn u caddeysay taageeradeeda buuxda ee ay u hayso midnimada dhuleed iyo madax-bannaanida qaran ee Jamhuuriyadda Federaalka Soomaaliya, iyadoo si cad u cambaareysay tallaabo kasta oo wax u dhimaysa dhulka iyo wadajirka qaranka Soomaaliyeed. Morocco waxay ku adkaysatay in aqoonsiga hay’ado gooni-u-goosad ah uusan waxba ka beddelayn xaqiiqooyinka sharci iyo siyaasadeed ee caalamku aqoonsan yahay, waxayna muujisay garab istaaggeeda mowqifka rasmiga ah ee dowladda Soomaaliya iyo hammiga shacabka Soomaaliyeed ee ku aaddan midnimo, amni iyo xasillooni.

Mowqifyadan mideysan ee ay qaateen Lubnaan, Morocco iyo Comoros ayaa kusoo beegmaya xilli ay sii kordhayaan falcelinta wadamada caalamka ee ka dhanka ah aqoonsiga Israa’iil ee Somaliland, iyadoo mar kale la xoojinayo in Somaliland ay tahay qayb aan laga go’yn karin Jamhuuriyadda Federaalka Soomaaliya, isla markaana tallaabooyin hal dhinac ah aysan wax saameyn ah ku yeelan karin sharciyadda caalamiga ah iyo midnimada dhuleed ee dalka.