Madasha arimaha Bini’aadantinimada Soomaaliya oo ka furmaysa Jowhar.

Jowhar, 10 November 2025 – Madasha Arrimaha Bini’aadantinimada Soomaaliya ayaa maanta ka furmaysa magaalada Jowhar, iyadoo mas’uuliyiintu sheegeen in sanadkan ay si aad ah u yaraadeen deeqaha ay Soomaaliya ka hesho caalamka.

Soomaaliya ayaa sanadkan codsatay 1.42 bilyan oo doolar si wax looga qabto xaaladaha bini’aadantinimo ee dalka, balse waxa ay heshay kaliya 272.8 milyan oo doolar, taas oo ah 19% keliya oo ka mid ah lacagtii la rabay. Hoos u dhacaas ayaa la xiriira go’aankii Mareykanka uu ku dhimeeyay deeqihii uu caalamka siin jiray, taas oo si weyn u saamaysay mashaariicda lagu badbaadinayo dadka ay saameeyeen abaaraha, fatahaadaha, iyo colaadaha.

Shirka ka furmaya Jowhar ayaa isku keenaya mas’uuliyiin iyo wakiillo ka socda gudaha iyo dibadda, oo ay ka mid yihiin Agaasimaha Guud ee SoDMA Maxamuud Macalin, Madaxweynaha HirShabelle Cali Guudlaawe, Agaasimaha Wasaaradda Beeraha ee Federaalka, iyo wufuud ka kala socota Bangiga Adduunka, Boqortooyada Ingiriiska, Mareykanka, Midowga Yurub, Turkey, iyo bulshada rayidka ah.

Shirka ayaa diiradda saaraya xoojinta hoggaanka Soomaalida ee isku dubaridka gargaarka bini’aadantinimo iyo ka qeybgalka bulshada gudaha ee caawinta dadka ay dhibaatooyinku saameeyeen. Inkastoo deeqaha hoos u dhaceen, haddana Soomaaliya sanadkan waxay ku dartay 9 milyan oo doolar oo ay iyadu bixisay, taas oo ka dhigaysa deeq-bixiyaha 9-aad ee ugu weyn ee deeqaha Soomaaliya bixiyay, iyadoo ka sarreysa dalal ay ka mid yihiin Imaaraadka Carabta, Sacuudi Carabiya, iyo Norway.

Mas’uuliyiinta ayaa tilmaamay in shirka Jowhar uu muujinayo muhiimadda ay leedahay iskaashiga caalamiga ah iyo ka qeybgalka gudaha si wax looga qabto xaaladaha musiibooyinka iyo baahiyaha sii kordhaya. Waxay sheegeen in qorsheynta wanaagsan, maareynta kheyraadka, iyo wada shaqeynta dowladda iyo hay’adaha gargaarka ay horseedi karaan horumar muuqda inkastoo deequhu yaraadeen.

Shirka Jowhar ayaa ah sii 9-aad oo ay qabato hay’ada SODMA waxaana lagu falanqeyn doonaa sidii loo mideyn lahaa isku xirka gargaarka bini’aadantinimada, digniinta hore, iyo qorsheyaasha adkeysiga ee heer federaal iyo dowlad-goboleed.