Asmara (Dawan)— Madaxweynaha Eritrea Isaias Afwerki ayaa dhaliilay nidaamka federaalka Soomaaliya, isaga oo sheegay in nidaamyada noocan ah ay marar badan ku guuldarreysteen inay ka jawaabaan rajada iyo himilooyinka shacabka ee ku aaddan midnimada iyo isku-duubnida, sida ay sheegtay maanta oo Talaado ah Wasaaradda Warfaafinta Eritrea.
Hadalkan ayaa Madaxweyne Isaias ka sheegay magaalada El Alamein ee Masar, halkaas oo uu kulan kula yeeshay Madaxweynaha Soomaaliya Xasan Sheekh Maxamuud. Labada Madaxweyne ayaa ka wada hadlay xiriirka labada dal iyo arrimo kale oo muhiim u ah Soomaaliya iyo gobolka.
Isaias ayaa sheegay in qaab-dhismeedyada siyaasadeed ee kala fogeeya bulshada, iyagoo ka faa’iideysanaya kala duwanaanshaha dhaqaale-bulsho, diimeed iyo qowmiyadeed, ay horseedi karaan qalalaase soo noqnoqda iyo faragelin shisheeye.
