Madaxweynaha Jabuuti oo cafis u fidiyay 194 maxbuus

Jabuuti – 2-da Janaayo 2026 ( Dawan)- Madaxweynaha Jamhuuriyadda Jabuuti, Ismaaciil Cumar Geelle, ayaa soo saaray digreeto madaxweyne oo cafis ugu fidinaysa 194 maxbuus oo ku xirnaa xabsiga dhexe ee Gabode, taas oo ah tallaabo lagu maamuusayo soo dhawaynta Sanadka Cusub ee 2026.

Cafiskan, oo dhaqan galay 31-kii Diseembar 2025, ayaa u gogol xaaray n 92 maxbuus si rasmi ah xorriyaddooda u helaan Khamiistii, 1-da Janaayo 2026.

Maxaabiista la sii daayay waxaa ka mid ah 16 maxbuus oo ajnabi ah, kuwaas oo lagu wado in dib loogu celiyo dalalkooda , iyadoo la raacayo habraacyada sharciyeed ee dalka.

Sidoo kale, digreetada madaxweynaha ayaa dhigaysa in 102 maxbuus oo kale laga dhimo muddada xukunadooda afar bilood, taasoo qayb ka ah tallaabooyin bini’aadamnimo oo ay dowladdu sheegtay in lagu xoojinayo is-dhexgalka bulshada iyo fursad-siinta maxaabiista.

Mas’uuliyiinta Jabuuti ayaa tilmaamay in cafiskan uu ka tarjumayo siyaasadda dowladdu ku wajahday daryeelka xuquuqda aadanaha, isla markaana uu yahay fariin rajo iyo bilow cusub u ah maxaabiista ka faa’iideystay go’aankan.