Madaxweynaha Somaliland oo ka dalbaday Israel inay safaarad ka furato Hargeysa

Qudus (Dawan) – Madaxweynaha Somaliland, Cabdiraxmaan Maxamed Cabdullaahi Cirro, ayaa Israel ugu baaqay inay kordhiso maalgashiga Somaliland, isla markaana ay safaarad ka furato Hargeysa, isagoo sheegay in xiriirka labada dhinac uu galayo marxalad cusub oo istaraatiiji ah.

Cirro ayaa hadalkan ka sheegay kulan uu magaalada Qudus kula yeeshay Wasiirka Arrimaha Dibadda Israel, Gideon Sa’ar, halkaas oo labada dhinac ay kaga hadleen xoojinta xiriirka Somaliland iyo Israel.

Madaxweynaha Somaliland ayaa sheegay in Somaliland ay dooneyso in ay Israel kala shaqeyso dhinacyada diblomaasiyadda, amniga, ganacsiga, maalgashiga iyo horumarinta bulshada.

Wuxuu xusay in maalgashadayaasha Israel ay fursado ka heli karaan Somaliland, gaar ahaan dhinacyada maaliyadda, dhismaha, beeraha, tamarta, dalxiiska, saadka iyo warshadaha soo saarista kheyraadka.

“Dalkeennu waa meel dhaqaale oo soo baxeysa, lehna fursado badan oo aan weli laga faa’iideysan, deegaan xasilloon oo ammaan ah, dhaqaale suuq xor ah iyo dowlad ka go’an inay fududeyso kobaca uu hoggaaminayo ganacsiga gaarka loo leeyahay,” ayuu yiri Cirro.

Cirro ayaa sidoo kale Israel ugu baaqay inay safaarad ka furato Somaliland, isagoo sheegay in tallaabadaas ay xoojin karto isku-xirka, iskaashiga iyo xiriirka fog ee labada dhinac.

“Waxaan si xooggan u dhiirrigelinaynaa in safaarad Israel leedahay laga furo Somaliland sida ugu dhaqsaha badan,” ayuu yiri.

Dhanka kale, Wasiirka Arrimaha Dibadda Israel, Gideon Sa’ar, ayaa sheegay in go’aanka Somaliland ee ah inay safaarad ka furato Qudus uu yahay mid taariikhi ah, isagoo xusay in Somaliland ay noqonayso dalkii siddeedaad ee tallaabadaas qaada

Sa’ar ayaa sheegay in Israel iyo Somaliland ay wadahadallo gaar ah lahaayeen ka hor inta aan xiriirka la shaacin, isla markaana uu Cirro kula kulmay Qudus bishii Oktoobar ee sanadkii hore.

“Qofna uma go’aaminayo Israel, qofna uma go’aaminayo Somaliland cidda ay xiriir diblomaasiyadeed la yeelanayaan,” ayuu yiri Sa’ar.

Cirro ayaa sheegay in Israel ay aqoonsatay Somaliland dabayaaqadii Diseembar 2025, isagoo booqashadiisa ku tilmaamay booqashadii ugu horreysay ee heer qaran ah oo Madaxweyne Somaliland ah uu ku tago Israel, iyo tii ugu horreysay ee noocan ah ee Madaxweyne Somaliland ah uu ku tago dal kale.

Wadahadallada ayaa yimid xilli Somaliland ay qorsheyneyso inay safaarad ka furato Qudus, taas oo ah tallaabo ay dhaliileen Dowladda Federaalka Soomaaliya iyo Falastiiniyiinba.