Madaxweynaha Soomaaliya oo ka qeybgelaya Kalfadhiga 81-aad ee Golaha Guud ee Qaramada Midoobay

New York (Dawan) – Madaxweynaha Soomaaliya Xasan Sheekh Maxamuud iyo wafdi ballaaran oo uu hoggaaminayo ayaa shalay gaaray magaalada New York ee Mareykanka, halkaas oo uu kaga qeybgalayo Kalfadhiga 81-aad ee Golaha Guud ee Qaramada Midoobay, sida ay baahisay Villa Somalia.

Wasiiru Dowlaha Wasaaradda Arrimaha Dibadda iyo Iskaashiga Caalamiga ah, Cali Maxamed Cumar (Cali Balcad), ayaa sheegay in Madaxweyne Xasan Sheekh lagu wado inuu 24-ka Sebtembar khudbad ka jeediyo Golaha Guud, isagoo ka hadli doona xaaladda Soomaaliya iyo arrimaha gobolka.

“Madaxweynaha ayaa khudbad ka jeedin doona Golaha loo dhan yahay ee Qaramada Midoobay maalinta ay bishu tahay 24-ka, taas oo uu ku taaban doono guud ahaan xaaladda dalka Soomaaliya iyo guud ahaan gobolka Geeska Afrika,” ayuu yiri Cali Balcad.

Waa la soo rareyaa Twitter...

Soomaaliya ayaa Kalfadhiga 81-aad uga qeybgaleysa iyadoo xubin aan joogto ahayn ka ah Golaha Ammaanka ee Qaramada Midoobay, waxaana Cali Balcad uu sheegay in xubinnimadaasi ay muhiimad gaar ah u leedahay ka qeybgalka Soomaaliya ee shirarka ka socda New York.

Madaxweynaha waxaa safarka ku weheliya wafdi ballaaran oo ka qeybgalaya shirar kala duwan oo barbar socda Kalfadhiga Golaha Guud, iyadoo sidoo kale la qorsheeyay kulamo doceedyo uu Xasan Sheekh la yeelan doono madaxda dalal kale iyo madaxda Qaramada Midoobay.

“Waxaan rajeyneynaa in Soomaaliya kaalinta ay kaga aaddan amniga iyo horumarka caalamkaba uu madaxweynuhu muujin doono muddada halkaas uu joogo,” ayuu yiri Cali Balcad.

Ka qeybgalka Soomaaliya ee Kalfadhiga 81-aad ayaa ku soo beegmaya xilli dalku ku jiro sannadkii labaad ee muddadiisa 2025-2026 ee xubinnimada aan joogtada ahayn ee Golaha Ammaanka, taas oo Soomaaliya u oggolaanaysa inay si toos ah uga qeybqaadato doodaha iyo go’aannada la xiriira nabadda iyo amniga caalamka.