Madaxweyne Geelle oo ka qaybgalay shir Madaxda Afrika uga hadleen faafitaanka Ebola

Jabuuti (Dawan) – Madaxweynaha Jabuuti, Ismaaciil Cumar Geelle, ayaa Talaadadii ka qayb galay shir muuqaal ah oo ay yeesheen madaxda dalalka Afrika, kaas oo looga hadlay xaaladda cudurka Ebola ee ka dillaacay Jamhuuriyadda Dimuqraadiga ah ee Congo (DRC) isla markaana gaaray dalka Uganda.

Shirka ayaa lagu falanqeeyay heerka uu marayo cudurka iyo tallaabooyinka loo baahan yahay in la xoojiyo si loo xakameeyo faafitaankiisa, gaar ahaan gobollada Ituri, North Kivu iyo South Kivu ee bariga DRC.

Sida ay sheegtay Wasaaradda Caafimaadka Congo 14-kii bishan, tirada dadka uu ku dhacay cudurka Ebola ayaa gaartay 782 qof, halka 181 qof ay u dhinteen. Waxaa sidoo kale la xaqiijiyay in 56 qof ay ka bogsadeen cudurka.

Madaxda Afrika ayaa ka dooday sidii loo xoojin lahaa baaritaannada caafimaad ee xuduudaha, raad-raaca dadka la xiriiray bukaannada iyo la socodka cudurka, si looga hortago inuu ku faafo dalal kale oo gobolka ka tirsan.

Shirka waxaa ka qayb galay Madaxweynayaasha Burundi, Koonfur Afrika, Botswana, Comoros, Equatorial Guinea iyo Zimbabwe, waxaana sidoo kale ka qeyb galay Guddoomiyaha Guddiga Midowga Afrika, Mahamoud Ali Youssouf, iyo Xoghayaha Guud ee Qaramada Midoobay, António Guterres.