Madaxweyne Xasan oo ka degay Addis Ababa xilli la sugayay shirka wadatashiga

Addis Ababa (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta gaaray magaalada Addis Ababa si uu uga qeybgalo Shirweynaha 39aad ee Hoggaamiyeyaasha Midowga Afrika, kaas oo ay isugu imanayaan madaxda dalalka Afrika, wasiirro, iyo mas’uuliyiin sare oo ka tirsan hay’adaha ururka.

Safarka madaxweynaha ayaa kusoo beegmaya iyada oo ay magaalada Muqdisho ku suganyihiin siyaasiyiinta ugu muhiimsan mucaaradka iyo madaxweynayaasha maamul goboleedyada Puntland iy Jubaland kuwaas oo la qorsheynayay inay wadahadal la galaan dowladda si xal loogu helo arrimaha la isku hayo ee doorashooyinka iyo siyaasadda dalka

Madaxweynaha ayaa Garoonka Diyaaradaha Caalamiga ah ee Bole International Airport waxaa ku soo dhaweeyay mas’uuliyiin ka tirsan Dowladda Itoobiya, oo ay ka mid yihiin Wasiirka Dakhliga, Ainalem Niguse, iyo Wasiiru dowlaha Arrimaha Dibadda, Berhanu Tsegaye.

"Madaxweyne Xasan Sheekh Maxamuud ayaa kulan-doceedyo la yeelan doonaa madaxda gobolka iyo kuwa Afrika ee Shirka ka qeyb-galaya, isagoo ku bogaadinaya, kuna adkaynaya mowqifka taariikhiga ah ee ay ka istaageen xadgudubka sharci darrada ah ee Israa'iil ay kula kacday midnimada Soomaaliya, ugana mahadcelinaya taageerida xubinnimada dalkeenna ee Golaha Ammaanka iyo Nabadda Afrika" ayaa lagu yiri qoraal kasoo baxay madaxtooyada

Shirweynaha 39aad ee Midowga Afrika ayaa sanadkan diiradda saaraya helitaanka biyo nadiif ah, nidaamyo fayadhowr oo ammaan ah, la-qabsiga isbeddelka cimilada, horumarinta dhaqaalaha, iyo xoojinta iskaashiga qaaradeed si loo gaaro yoolalka Ajandaha 2063. Inta uu shirku socdo, hoggaamiyeyaasha Afrika ayaa la filayaa inay ansixiyaan go’aanno iyo qaraarro la xiriira hirgelinta Ajandaha 2063, nabadda iyo amniga qaaradda, iyo doorka Afrika ee masraxa caalamiga ah.

Ka-qeybgalka Madaxweynaha Soomaaliya ee shirkan ayaa la filayaa inuu xoojiyo doorka dalka ee wadahadallada qaaradeed, isla markaana uu fursad u noqdo wada-hadallo laba-geesood ah oo la xiriira arrimaha amniga, horumarka, iyo iskaashiga gobolka.