Mareykanka oo ka digay rabshado ka dhasha xiisadda siyaasadeed ee Soomaaliya

Muqdisho (Dawan) – Dowladda Mareykanka ayaa ugu baaqday dhinacyada siyaasadda Soomaaliya inay muujiyaan is-xakameyn, kana fogaadaan tallaabooyin horseedi kara rabshado ama xasillooni-darro, iyadoo ku boorrisay inay doortaan wadahadal iyo iskaashi lagu ilaalinayo nabadda iyo xasilloonida dalka.

Qoraal ay maanta oo Isniin ah soo saartay Safaaradda Mareykanka ee Muqdisho, ayay ku sheegtay inay muhiim tahay in dhinacyada siyaasadeed ay ka fogaadaan tallaabo kasta oo sii hurin karta xiisadaha taagan.

“Dowladda Mareykanka waxay ugu baaqeysaa dhammaan dhinacyada inay muujiyaan is-xakameyn, kana fogaadaan tallaabooyin hurinaya rabshado ama xasillooni-darro,” ayaa lagu yiri qoraalka safaaradda.

Safaaraddu waxay intaas ku dartay in loo baahan yahay wadahadal iyo iskaashi si loo ilaaliyo nabadda iyo xasilloonida Soomaaliya.

“Waxaan ku dhiirrigelineynaa dhammaan dhinacyada inay u istaagaan wadahadal iyo iskaashi lagu taageerayo nabadda iyo xasilloonida guud ahaan Soomaaliya,” ayay safaaraddu raacisay.

Baaqa Mareykanka ayaa imanaya xilli ay sii kordhayaan xiisadaha siyaasadeed ee u dhexeeya Dowladda Federaalka Soomaaliya iyo siyaasiyiinta mucaaradka ee ku sugan Muqdisho. Mucaaradka ayaa dhawaan ku baaqay bannaanbax dadweyne oo la qorsheeyay inuu qabsoomo 4-ta Juun, arrintaas oo sare u qaaday walaaca laga qabo xaaladda siyaasadeed ee dalka.

Hadalkan Mareykanka ayaa sidoo kale daba socda baaqyo la mid ah oo ka yimid saaxiibbada caalamka, kuwaas oo ku boorriyay hoggaamiyeyaasha Soomaalida inay dib u billaabaan wadahadalka siyaasadeed, isla markaana ay heshiis ka gaaraan arrimaha la xiriira hannaanka doorashooyinka iyo mustaqbalka dowladnimada Soomaaliya.

Bayaan wadajir ah oo ay maanta soo saareen xubno ka tirsan beesha caalamka ayaa lagu sheegay inay lagama maarmaan tahay in dhinacyadu sida ugu dhaqsaha badan dib ugu laabtaan miiska wadahadalka.

“Waxaan dhammaan dhinacyada ugu baaqeynaa inay dib u billaabaan wadahadal sida ugu dhaqsiyaha badan, isla markaana ay si degdeg ah heshiis uga gaaraan hannaanka doorashada, iyadoo la eegayo danta shacabka Soomaaliyeed. Waxaan diyaar u nahay inaan taageerno wadahadallo Soomaali hoggaaminayaan haddii nalaga codsado,” ayaa lagu yiri bayaanka.

Qoraalkaasi waxaa saxiixay Midowga Yurub, Hawlgalka Kumeelgaarka ah ee Qaramada Midoobay ee Soomaaliya (UNTMIS), iyo safaarado dhowr ah oo reer galbeed ah oo ay ka mid yihiin Boqortooyada Ingiriiska, Talyaaniga, Faransiiska, Jarmalka, Netherlands, Norway, Sweden, Switzerland, Ireland, Austria, Belgium, Poland, Spain iyo Finland.

Baaqyada isdaba joogga ah ee ka imanaya saaxiibbada caalamka ayaa muujinaya walaaca sii kordhaya ee laga qabo saameynta ay xiisadaha siyaasadeed ku yeelan karaan xasilloonida Soomaaliya iyo geeddi-socodka doorashooyinka dalka.