Mareykanka oo Soomaaliya ugu hambalyeeyay kowda Luulyo

Muqdisho (Dawan) – Dowladda Mareykanka ayaa shacabka Soomaaliyeed ugu hambalyeysay munaasabadda 1-da Luulyo, oo ah Maalinta Xorriyadda iyo Midnimada Soomaaliya, iyadoo u rajeysay nabad, xasillooni iyo mustaqbal wanaagsan.

War qoraal ah oo ay soo saartay Safaaradda Mareykanka ee Muqdisho ayaa lagu sheegay hambalyo ku socota shacabka Soomaaliyeed, iyadoo lagu xusay muhiimadda maalintan taariikhiga ah.

“Maalin Xorriyadeed oo Farxad u leh shacabka Soomaaliyeed,” ayay safaaraddu ku tiri farriinteeda.

Safaaradda ayaa intaas ku dartay in Mareykanku uu shacabka Soomaaliyeed la wadaagayo hambalyada munaasabaddan qaran, isla markaana uu u rajeynayo nabad waarta, xasillooni iyo horumar.

“Maalintan muhiimka ah, Mareykanku wuxuu shacabka Soomaaliyeed u wadaagaya hambalyadiisa iyo rajadiisa ku aaddan nabad, xasillooni iyo mustaqbal wanaagsan,” ayaa lagu yiri bayaanka.

Kowda Luulyo ay tahay maalin ay shacabka Soomaaliyeed dib ugu milicsadaan taariikhdooda, aqoonsigooda qaran iyo himilooyinka mustaqbalka, isla markaana ay tahay fursad ay saaxiibbada caalamku ku muujiyaan garab istaagooda Soomaaliya.

Farriintan ayaa ka tarjumaysa xiriirka diblomaasiyadeed iyo iskaashiga u dhexeeya Soomaaliya iyo Mareykanka, iyadoo labada dal ay sii wadaan wada shaqeynta dhinacyada nabadda, amniga, horumarka iyo xasilloonida.

Soomaaliya ayaa sanad kasta u dabaaldegta 1-da Luulyo, oo ku beegan xornimadii gobollada Koonfureed iyo midowgii Waqooyiga iyo Koonfurta Soomaaliya sanadkii 1960, taas oo horseedday aasaaska Jamhuuriyadda Soomaaliyeed.