Washington (Dawan) – Dowladda Mareykanka ayaa Arbacadii ku dhawaaqday xayiraado fiise oo lagu soo rogay xubno ka tirsan garabka mayalka adag ee Jabhadda Xoreynta Shacabka Tigray (TPLF), iyadoo ku eedeysay inay carqaladeynayaan dadaallada lagu xallinayo xiisadaha ka taagan waqooyiga Itoobiya.
Sida lagu sheegay bayaan ay Wasaaradda Arrimaha Dibadda Mareykanku soo saartay 17-kii Juun 2026, xayiraaduhu waxay sidoo kale khuseeyaan xubnaha qoysaska dhow ee dadka la bartilmaameedsaday.
Xoghayaha Arrimaha Dibadda Mareykanka, Marco Rubio, ayaa ansixiyay tallaabadan isaga oo adeegsanaya qodob ka mid ah sharciga socdaalka Mareykanka, kaas oo dowladda u oggolaanaya inay xaddiddo gelitaanka dadka joogitaankooda loo arko inuu saameyn taban ku yeelan karo siyaasadda arrimaha dibadda ee dalka.
Wasaaradda Arrimaha Dibadda ma aysan shaacin magacyada mas’uuliyiinta ay xayiraaduhu saameeyeen, sidoo kalena ma aysan sheegin tirada dadka la beegsaday.
Washington ayaa sheegtay in xiisadaha u dhexeeya garabka mayalka adag ee TPLF iyo dowladda federaalka Itoobiya ay halis ugu jiraan inay dib u huriyaan colaaddii Tigray, isla markaana ay khatar ku yihiin amniga iyo xasilloonida Geeska Afrika.
TPLF waa xisbi siyaasadeed oo leh garab hubeysan oo ka soo jeeda gobolka Tigray, kaas oo muddo dheer saameyn weyn ku lahaa siyaasadda Itoobiya. Ururku wuxuu xubin muhiim ah ka ahaa isbahaysigii EPRDF ee dalka xukumayay ku dhowaad soddonkii sano ee la soo dhaafay, balse xiriirkiisa dowladda federaalka ayaa sii xumaaday kaddib isbeddelladii siyaasadeed ee billowday sannadkii 2018. Dowladda Itoobiya iyo TPLF ayaa dagaal dhex maray sannadkii 2020, ka hor intii aan heshiis nabadeed lagu kala saxeexan magaalada Pretoria bishii Nofeembar 2022.
