Addis Ababa (Dawan) – Wasiirka Arrimaha Dibadda ee Masar, Badr Abdelatty, ayaa si adag u diiday waxa uu ku tilmaamay aqoonsi sharci-darro ah oo la siiyo maamul gooni goosad ah, xilli uu ka hadlayay shirkii Golaha Nabadda iyo Amniga ee Midowha Africa oo shalay ka dhacay magaalada Addis Ababa.
Isagoo ka hadlayay fadhiga golaha, Abdelatty wuxuu sheegay in Masar marar badan caddeysay in aqoonsiga Israa’iil ee Somaliland uusan wax micne sharci ah lahayn, maadaama uu ka hor imanayo xeerarka iyo heshiisyada caalamiga ah, oo ay ku jirto Axdiga Aasaaska Midowga Afrika.
Wuxuu intaas ku daray in mowqifkaasi uu si toos ah uga hor imanayo mabaa’di’dii ay ku heshiiyeen aasaasayaashii ururka Midowga Africa gaar ahaan ilaalinta xurmada xuduudaha dalalka iyo mamnuucidda faragelinta arrimaha gudaha ama jebinta xuduudahaas.
“Arrintan mar kale si cad ayaa loo adkeeyay,” ayuu yiri Abdelatty, isagoo xusay in ixtiraamka xuduudaha jira uu yahay tiir muhiim u ah midnimada iyo xasilloonida Afrika.
