Kenya (Dawan) – Mashruuca weyn ee Kenya ku doonayso inay ku dhisto xarunteedii ugu horreysay ee tamarta nukliyeerka ayaa wajahaya caqabad siyaasadeed iyo mid bulsho, kaddib markii ay soo baxday kalsooni la’aan xooggan oo ka timid bulshada deegaanka loo qorsheeyay in mashruucu ka hirgalo.
Kulankii wacyigelinta ahaa ee ka dhacay Nango, ayaa si lama filaan ah u istaagay, kaddib markii shacabka deegaanka ay diideen habka loo maray wada-tashiga. Dadka deegaanka ayaa ku adkaystay in hoggaamiyeyaasha la doortay, odeyaasha dhaqanka iyo waxgaradka deegaanka ay noqdaan kuwa hormuud ka ah doodaha, halkii la-taliyeyaal laga keeni lahaa meel ka baxsan deegaanka.
“Annagu ma diidnayn mashruuca. Waxa aan diidanahay waa habka loo marayo. Hoggaamiyeyaashayada waa in ay safka hore ku jiraan ka hor inta aan nala weydiin oggolaansho.” ayay tiri Rose Manowa, guddoomiyaha suuqa Nango.
Hadalladaas ayaa muujinaya caqabad ku saabsan maamulka iyo kalsoonida bulshada, taas oo si toos ah u saameyn karta mustaqbalka mashruucan lagu qiimeeyay in uu ku kacayo in ka badan KSh 500 bilyan ($3.9 bilyan).
Mashruuca nukliyeerka oo la qorsheeyay in uu soo saaro 2,000 megawatt, ayaa qayb ka ah qorshaha Madaxweynaha William Ruto ee lagu ballaarinayo awoodda korontada dalka, laguna gaarsiiyo 10,000 megawatt sanadaha soo socda.
Si kastaba ha ahaatee, shacabka Nango ayaa walaac ka muujiyay habka wacyigelinta, iyaga oo sheegay in bandhigyada qaar ay muujiyeen taageero hore oo aan ka tarjumayn wada-tashi dhab ah. Qaar ka mid ah dadka deegaanka ayaa su’aal geliyay sababta diiradda loo saaray kaliya faa’iidooyinka dhaqaale, iyadoo aan si miisaan leh aan looga hadlin khataraha caafimaad ee deegaanka iyo bulshada.
