Muqdisho (Dawan) – Minbarka masaajidda ayaa mar kale noqday goob ay siyaasiyiinta Soomaaliya ka jeediyaan farriimo siyaasadeed, iyadoo xubno ka tirsan mucaaradka ay hadda ku biireen dhaqan hore loogu eedeyn jiray madaxda dowladda.
Arrintan ayaa timid kadib markii siyaasiyiin mucaarad ah ay bilaabeen inay khudbado iyo farriimo siyaasadeed ka jeediyaan masaajidda, xilli ay hore u dhaliili jireen Madaxweynaha Soomaaliya, Xasan Sheekh Maxamuud, oo ay ku eedeyn jireen inuu siyaasadda gudaha kala hadlo shacabka isaga oo jooga masjidka, mararka qaarna halkaas uga jawaabo mucaaradka ay kala aragti duwan yihiin.
Cabdiraxmaan Cabdishakuur Warsame ayaa ka mid ahaa siyaasiyiinta mucaaradka ee hore khudbad uga jeediyay masjid, halka Ra’iisul Wasaarihii hore Xasan Cali Kheyre uu shalay ka hadlay masjid kadib Salaaddii Jimcaha, isaga oo bulshada ugu baaqay inay ka qayb qaataan bannaanbaxyo looga soo horjeedo qaar ka mid ah ficillada maamulka Madaxweyne Xasan Sheekh.
Labada dhacdo ayaa muujinaya in mucaaradku hadda adeegsanayo isla madashii ay hore madaxda dowladda ugu gudbin jireen fariimaha siyaasadeed.
Madaxweyne Xasan Sheekh Maxamuud ayaa hore dhowr jeer uga hadlay masaajidda kadib Salaadda Jimcaha, isaga oo shacabka la wadaagay farriimo la xiriira xaaladda siyaasadeed, amniga iyo doodaha ka taagan dalka. Sidoo kale, Guddoomiyaha Golaha Shacabka, Aadan Maxamed Nuur Madoobe, ayaa isna dhowr jeer khudbado noocan ah ka jeediyay masaajid, taas oo sii xoojisay doodda ah in minbarka masjidka uu noqday meel ay siyaasiyiintu shacabka kula hadlaan.
