Maxaa ka dhigaya xiriirka Jabuuti iyo Yurub mid istiraatiiji ah?

Jabuuti (Dawan) – Dowladda Jabuuti iyo Midowga Yurub ayaa sii xoojinaya xiriirkooda dhinacyada amniga iyo horumarinta, sida ay sheegtay Wakaaladda Wararka Jabuuti (ADI) Isniintii.

Wasiirka Arrimaha Dibadda iyo Iskaashiga Caalamiga, Cabdulkadir Xuseen Cumar, ayaa sheegay in xiriirka labada dhinac uu yahay mid “xooggan” oo ku dhisan qiyamka wadajirka ah sida nabadda, iskaashiga iyo ixtiraamka xeerarka caalamiga ah.

Wuxuu hadalkan ka sheegay munaasabad lagu xusayay Maalinta Yurub oo lagu qabtay magaalada Jabuuti, halkaas oo ay ka soo qeyb galeen xubno ka tirsan dowladda, diblomaasiyiin iyo bahda horumarinta.

“Xiriirkani waa mid soo jireen ah oo daboolaya dhinacyo kala duwan, laga bilaabo horumarinta dhaqaalaha ilaa amniga gobolka,” ayuu yiri wasiirku, sida ay werisay ADI.

Wasiirka ayaa sidoo kale tilmaamay in iskaashiga labada dhinac uu si gaar ah uga muuqdo dhinaca amniga badda, isagoo tusaale u soo qaatay hawlgalka Midowga Yurub ee ASPIDES, oo loogu talagalay ilaalinta marinnada ganacsiga.

Jabuuti, oo ku taalla meel istiraatiiji ah oo laga galo Badda Cas, ayaa loo arkaa saaxib muhiim ah oo ka qeyb qaata sugidda marinnadaas muhiimka u ah ganacsiga caalamka.

Maalinta Yurub, oo sanad walba la xuso 9-ka May, ayaa lagu xasuustaa Bayaankii Schuman ee 1950, kaas oo ahaa bilowgii dhismaha Midowga Yurub.