Muqdisho (Dawan)- Golaha Shacabka Soomaaliya ayaa maanta ansixiyay in la joojiyo qaaraanka bil kasta laga jari jiray gunada xildhibaanada, kaas oo xildhibaan kasta laga qaadi jiray $100. Qaaraanka ayaa loo sameeyay in lagu taageero xildhibaanada la soo gudboonaada xaalado caafimaad iyo in lagu daboolo kharashaadka aaska iyo tacsiyeedka xildhibaanada geeriyooda.
Sida uu sheegay Xildhibaan Cabdisalaan Dhabancad, lacagta laga ururin jiray xildhibaanada ayaa bishii gaareysay ku dhawaad $27,500. Qaaraankan waxaa la jideeyay sanadkii 2013, xilligii uu shaqeynayay Baarlamaankii 9-aad, iyadoo xilligaas ay jireen xaalado amni oo sababay in xildhibaano badan la dilo, halka qaar kalena la dhaawaco.
Qorshihii markii hore lagu saleeyay qaaraanka ayaa dhigayay in xildhibaan geeriyooda loo qoondeeyo $30,000 oo loogu talagalay kharashaadka aaska iyo tacsiyeedka, sida uu sheegay Hab-dhowraha Golaha Shacabka.
Baarlamaankii 9-aad ee qaaraanka sameeyay ayaa waxaa ka geeriyooday 18 xildhibaan, kuwaas oo qaarkood lagu dilay weerarro. Hase yeeshee, sannadihii u dambeeyay waxaa hoos u dhacay dilalka si toos ah loogu bartilmaameedsado xildhibaanada, iyadoo sidoo kale la sheegay in xaaladda amni ay soo hagaagtay. Arrimahaas ayaa qayb ka noqday sababaha loo arkay in laga maarmi karo qaaraanka.
