Maxaa sababay in dib loo dhigo shirkii mucaaradka?

Muqdisho (Dawan) – Afhayeenka Madasha Samatabixinta, Maxamed Maxamuud Diiriye, ayaa faahfaahin ka bixiyay sababihi keenay in dib loo dhigo shirkii mucaaradka ee la qorsheeyay inuu qabsoomo 10-kii Abriil, sababo tilmaamay in loo baahday wadatashi ballaaran iyo kordhinta ka qeybgalka bulshada.

Wareysi gaar ah oo uu siiyay Dawan Media, ayuu Diiriye ku sheegay in go’aanka dib u dhigista uu yimid kaddib markii la arkay muhiimadda ay leedahay in la helo ka qeybgal ballaaran oo ka tarjumaya aragtida qeybaha kala duwan ee bulshada Soomaaliyeed.

“Marka waxaa noo muuqatay in shirka dib loo dhigo, wadatashi ballaaran la sameeyo oo qabanqaabo intii ka ballaaran la sameeyo, si uu u noqdo shir abaabulan oo micno weyn u sameeya Soomaaliya,” ayuu yiri afhayeenka.

Wuxuu intaas ku daray in waqtiga rasmiga ah iyo goobta uu shirka ka dhici doono dib laga soo sheegi doono, marka la soo dhameystiro diyaar-garowga cusub.

Diiriye ayaa sidoo kale meesha ka saaray in imaanshaha markabka Turkiga ee shidaalka ka qodaya Soomaaliya inuu saamayn ku yeeshay shirka, isagoo sheegay in arrintaas aysan wax saameyn ah ku lahayn go’aanka madasha.

“Wax saameyn ah inuu nagu yeelan lahaa uma maleynayo, balse sababaha ugu waaweyn ee shirka loo baajiyay waxaa ka mid ah inaan ballaarinno, oo aan isugu yeerno dadka Soomaaliyeed ee miisaanka leh,” ayuu yiri.

Madasha Samatabixinta ayaa hore u qorsheysay shirkan oo lagu waday inuu qabsoomo 10-ka Abriil, si looga arrinsado xaaladda siyaasadeed ee dalka, balse dib u dhigista ayaa muujineysa dadaal lagu doonayo in shirka laga dhigo mid loo dhan yahay oo leh saameyn ballaaran.