Muqdisho (Dawan)– Hay’adda Nabadsugidda iyo Sirdoonka Qaranka (NISA), oo kaashanaysa saaxiibada caalamka, ayaa sheegtay in hawlgal qorsheysan oo ka dhacay deegaanka Warciise, oo qiyaastii 25 km u jira magaalada Jowhar ee gobolka Shabeellaha Dhexe, lagu dilay laba hoggaamiye oo ka tirsanaa Al-Shabaab iyo toddobo kale oo xubno ka ahaa kooxda.
NISA ayaa sheegtay in hawlgalku lagu beegsaday koox ka tirsan Al-Shabaab oo ku sugneyd deegaanka Warciise, halkaas oo ay hay’addu sheegtay inay ku lahaayeen xarumo iyo goobo ay ku kulmaan.
Labada hoggaamiye ee NISA sheegtay in lagu dilay hawlgalka ayaa kala ahaa Axmed Cali Jimcaale, oo hay’addu ku tilmaantay hoggaamiyaha Al-Shabaab ee degmada Jowhar, iyo Geedi Maxamed Nuur Cadde, oo ay ku sheegtay hoggaamiyaha kooxda ee deegaannada Dumaaye iyo Dabagaalo.
Hay’addu waxay sheegtay in labada hoggaamiye muddo lala socday, iyadoo la uruurinayay xog ku saabsan dhaq-dhaqaaqyadooda iyo hawlaha ay ka wadeen deegaannada ay ku sugnaayeen, ka hor inta aan la fulin hawlgalka.
