Maxay Jabuuti la tagtay shirka Madasha dalalka yaryar ee IMF iyo Bangiga Adduunka?

Washington (Dawan ) – Dowladda Jabuuti ayaa ka qeyb gashay Madasha Dalalka Yaryar , oo lagu qabtay magaalada Washington DC, taas oo ka mid ahayd shirarka sanadlaha ah ee kooxda Bangiga Adduunka iyo Sanduuqa Lacagta Adduunka.

Madashan ayaa kulmisay wasiirrada maaliyadda iyo guddoomiyeyaasha bangiyada dhexe ee dalalka yaryar, kuwaas oo wada-hadallo la yeeshay hoggaanka Bangiga Adduunka iyo la-hawlgalayaal caalami ah, iyagoo diiradda saaray istaraatiijiyadda cusub ee Bangiga Adduunka ee dalalka yaryar.

Wararka ayaa sheegaya in doodaha si gaar ah looga hadlay caqabadaha ay wajahaan dalalka yaryar, oo ay ka mid yihiin nuglaanta dhaqaale, isbeddelka cimilada, iyo ku tiirsanaanta dibadda, iyadoo sidoo kale la falanqeeyay fursadaha horumarineed iyo iskaashiga caalamiga ah.

Madasha waxaa guddoomiyay Ra’iisul Wasaare Ku-xigeenka iyo Wasiirka Maaliyadda ee Cabo Verde, Olavo Correia, kaas oo ku dhawaaqay in Ra’iisul Wasaaraha Belize, John Briceño, loo doortay guddoomiyaha cusub ee Madasha Dalalka Yaryar.

Ka qeybgalka Jabuuti ee madashan ayaa imanaya xilli dalalka yaryar ay dadaal ugu jiraan xoojinta codkooda ku aaddan siyaasadaha maaliyadeed ee caalamiga ah, gaar ahaan marka la eego saameynta dhaqaale ee caalamiga ah iyo caqabadaha sii kordhaya ee horumarineed.