Garoowe (Dawan)- Dowlad Goboleedka Puntland ayaa ugu baaqday Madaxweynaha Jamhuuriyadda Federaalka Soomaaliya Xasan Sheekh Maxamuud in uu qabto shir wadatashi degdeg ah oo lagu xallinayo khilaafaadka ka taagan arrimaha doorashooyinka, xilli Puntland ay qabto in uu jiro walaac sii kordhaya oo ku saabsan hubanti la’aan siyaasadeed.
Puntland ayaa sheegtay in baaqan uu yimid kadib walaac la xiriira waxa ay ku tilmaantay “firaaq dastuur oo soo wajahaya dalka”, iyada uu dhammaaday muddo xileedkii Baarlamaanka Federaalka ee 4 sano, isla markaana uu soo dhow yahay dhammaadka muddo xileedka Madaxweynaha.
War-saxaafadeed ka soo baxay shirarka Golaha Wasiirrada ee Garoowe ayaa lagu adkeeyay baahida loo qabo wadatashi degdeg ah oo ay ka qeyb galaan dowladaha federaalka iyo dowlad goboleedyada, si loo gaaro heshiis ku saabsan hanaanka doorashooyinka.
