Muqdisho (Dawan) — Soomaaliya ayaa noqotay dalkii 50-aad ee ansixiya heshiiska Aagga Ganacsiga Xorta ah ee Qaaradda Afrika (AfCFTA), tallaabadaas oo dalka u furtay fursad uu kaga faa’iideysto mid ka mid ah suuqyada ugu waaweyn ee dunida, oo ay ku nool yihiin ku dhawaad 1.4 bilyan oo qof, isla markaana leh dhaqaale lagu qiyaaso in ka badan 3.4 tiriliyan oo dollar.
Ku biirista heshiiskan ayaa dowladda Soomaaliya ay u aragtaa fursad lagu ballaarin karo wax-soo-saarka gudaha, laguna dhiirrigelin karo maalgashiga warshadaha, isla markaana badeecooyinka Soomaaliyeed loo gaarsiin karo suuqyada qaaradda.
Wasiirka Ganacsiga iyo Warshadaha Soomaaliya, Jamaal Maxamed, ayaa sheegay in dowladda ay qorshaynayso in meelo gaar ah laga sameeyo goobo warshadeed oo lagu diyaariyo badeecooyinka dalka, si loogu dhoofiyo suuqyada Afrika iyadoo ay xambaarsan yihiin magaca “Made in Somalia”.
“Arrintan waxay dhiirrigelin doontaa inaan sameysanno, arrintaasna beryahan aan ka shaqeynayno, meelo gaar ah oo aag warshado ah, oo lagu diyaariyo badeecadaha dalka laga dhoofin lahaa iyadoo ay wadato magaca ‘Made in Somalia’,” ayuu yiri Jamaal Maxamed.
Heshiiska AfCFTA wuxuu dhigayaa hannaan lagu fududeynayo ganacsiga badeecooyinka iyo adeegyada u dhexeeya dalalka Afrika, iyadoo sidoo kale la isku dayayo in la yareeyo caqabadaha ganacsi ee ka hor yimaada badeecadaha ka gudbaya xuduudaha qaaradda.
