Muqdisho (Dawan) — Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa xubno ka tirsan bulshada rayidka ah ee dalka kala hadlay doorka ay ku leeyihiin nabadeynta iyo dib-u-heshiisiinta bulshada Soomaaliyeed.
Sida lagu sheegay war-saxaafadeed ka soo baxay Madaxtooyada Soomaaliya, kulanka ayuu madaxweynuhu kala hadlay xubnaha matalayay bulshada rayidka ah dhammaystirka hannaanka dimuqraadiyadeed ee dalka, dhismaha dowladnimada, iyo horumarka laga gaaray dhinacyada amniga, maamul-wanaagga iyo doorashooyinka dadweynaha ee qof iyo codka ah.
Madaxweynuhu wuxuu adkeeyay muhiimadda ay bulshada rayidku ku leedahay xoojinta nabadda gudaha, horumarinta wadajirka bulshada, iyo ilaalinta xuquuqda muwaadiniinta. Waxa uu sidoo kale sheegay in bulshada rayidku ay yihiin laf-dhabarta hannaanka dib-u-heshiisiinta iyo xasilinta dalka.
