Muqdisho (Dawan)— Safiirka Midowga Yurub ee Soomaaliya, László Máthé, ayaa kulan la yeeshay Ra’iisul Wasaarihii hore ee Soomaaliya, Maxamed Xuseen Rooble, iyaga oo kawada hadlay xaaladda siyaasadeed ee dalka iyo baahida loo qabo wadahadal qaran oo loo dhan yahay.
Sida ay sheegtay Safaaradda Midowga Yurub ee Soomaaliya, labada mas’uul ayaa kulanka ku falanqeeyay xaaladihii siyaasadeed ee ugu dambeeyay, iyaga oo isweydaarsaday aragtiyo ku saabsan muhiimadda wadahadal ay Soomaalidu hoggaaminayso, si xal looga gaaro khilaafaadka jira, loona xoojiyo xasilloonida dalka.