Brussels (Dawan)— Xildhibaanno ka socda dalalka Afrika, Kariibiyaanka iyo Baasifigga ayaa Midowga Yurub ka dalbaday in macdanta iyo khayraadka dabiiciga ah lagu warshadeeyo dalalka laga soo saaro, si loo kordhiyo faa’iidada dhaqaale ee dalalkaas, loona abuuro fursado shaqo.
Sida ay werisay Wakaaladda Wararka Jabuuti (ADI), dalabkan ayaa lagu soo bandhigay kulamo baarlamaani ah oo ka dhacay magaalada Brussels, kuwaas oo ay yeesheen Ururka Dowladaha Afrika, Kariibiyaanka iyo Baasifigga (OEACP) iyo Golaha Baarlamaanka Wadajirka ah ee ururkaas iyo Midowga Yurub.
Wadahadallada ayaa si gaar ah diiradda loogu saaray macdanta muhiimka u ah warshadaha casriga ah, sida lithium, cobalt iyo macdanta dhifka ah, kuwaas oo Midowga Yurub u baahan yahay si uu ugu gudbo isticmaalka tamarta nadiifta ah. Wufuudda ka qaybgalaysay kulamada ayaa ku baaqay in dalalka macdantaas soo saara laga hirgeliyo warshado lagu farsameeyo, isla markaana la gaarsiiyo teknoolojiyadda casriga ah, lana horumariyo kaabeyaasha dhaqaalaha, tababarrada xirfadeed iyo fursadaha shaqo.
Sida lagu sheegay war-saxaafadeedka wafdiga Jabuuti, ujeeddadu waa in la helo iskaashi dhaqaale oo dheellitiran, kaas oo labada dhinacba faa’iido u leh. Xildhibaannadu waxay sidoo kale ka hadleen maalgelinta barnaamijka Global Gateway ee Midowga Yurub, iyaga oo dalbaday in la helo dhaqaale la isku halleyn karo oo waafaqsan mudnaanta dalalka ka faa’iideysanaya, isla markaana aan kordhinayn culayska deynta.