Muqdisho (Dawan)- Wadahadallo u dhexeeyay Guddoomiyaha Golaha Shacabka Baarlamaanka Federaalka Soomaaliya, Cabdulqaadir Maxamed Nuur, iyo guddi matalayay Xildhibaannada Mucaaradka ayaa maanta, Axad 23-ka Agoosto, ku soo gabagaboobay magaalada Muqdisho.
Kulanka ayaa diiradda lagu saaray dardargelinta howlaha Golaha Shacabka, xoojinta wada-shaqeynta xildhibaannada iyo sidii loo yareyn lahaa khilaafaadka siyaasadeed ee saameeyay shaqada Baarlamaanka.
Sida lagu sheegay qoraal kasoo baxay Golaha Shacabka, dhinacyadu waxay isku raaceen in Golaha Shacabka uu ahaado mid dhexdhexaad u ah dhammaan dhinacyada siyaasadda.
Heshiiska ayaa sidoo kale dhigaya in Xildhibaan kasta uu xaq u leeyahay inuu si xor ah u cabbiro aragtidiisa iyo fikirkiisa, iyadoo la dhowrayo qodobada Xeer-hoosaadka Golaha Shacabka.
