Soomaaliya, 15 Maarso 2026 (Dawan)– Guddiga gurmadka abaaraha ee Puntland ayaa sheegay inay ururiyeen ku dhawaad $1 milyan oo doollar si wax looga qabto dhibaatada bini’aadantinimo ee ka taagan gobolka, sida ay masuuliyiintu sheegeen Sabtidii.
Guddigan oo ka kooban culimo, ganacsato iyo masuuliyiin dowladeed ayaa tilmaamay in ilaa hadda la ururiyay $963,400. Lacagtaas, $583,447 ayaa lagu kharash gareeyay hawlo gargaar, halka $379,953 ay harsan tahay si loogu fuliyo hawlgallo gurmad oo dheeraad ah.
Wasiirka Maaliyadda Puntland, Maxamed Faarax Maxamuud, ayaa carrabka ku adkeeyay hufnaanta maareynta sanduuqa, xilli guddigu shir jaraa’id ku qabtay magaalada Garowe.
“Waxaan halkaan u nimid inaan bixino warbixin ku saabsan shaqada guddiga gurmadka abaaraha,” ayuu yiri wasiirku. “Ku dhawaad hal milyan oo doollar ayaa la helay intii uu guddigu shaqeynayay… ilaa $600,000 waa la kharash gareeyay. Waxaan u diyaar garoobeynaa inaan si degdeg ah u gaarno meelaha ay baahiyaha ugu daran ka jiraan.” ayuu ku daray hadalkiisa.
Guddigu wuxuu sheegay in kharashka la bixiyay loo adeegsaday:
$345,900 oo lagu bixiyay in ka badan 4,000 oo booyadood oo biyo dhaamin ah.
