Muqdisho (Dawan) – Xildhibaan Cabdiraxmaan Cabdishakuur Warsame, oo ka tirsan Madasha Samatabixinta Soomaaliyeed, ayaa sheegay in wadahadallo hordhac ah oo ay la yeesheen wafdi sare oo ka socday dowladda Turkiga ay diiradda saareen arrimaha siyaasadda, amniga iyo dadaallada lagu dejinayo xiisadda ka taagan dalka.
Cabdiraxmaan Cabdishakuur ayaa sheegay in Madasha Samatabixinta ay kulamo la qaadatay wafdiga Turkiga iyo xubno ka tirsan beesha caalamka, kuwaas oo looga hadlay qaabka iyo ajandaha wadahadal siyaasadeed oo la doonayo in lagu xalliyo khilaafaadka jira.
Sida uu sheegay, dhinacyadu waxay ka wada hadleen habka uu u dhici karo wadahadalka, ajandayaasha la isku hayo iyo sida la isku waafajin karo dadaallada cusub iyo kuwii hore ee lagu doonayay in lagu xalliyo muranka siyaasadeed.
“Waxaan ka wada hadalnay ajandaha wadahadalka, qaabka wadahadalku uu noqonayo iyo sida loo tansiiqi karo wadahadallada hadda socda iyo kuwii hore,” ayuu yiri Cabdiraxmaan Cabdishakuur, isagoo xusay in kulamadu ku soo dhammaadeen jawi wanaagsan isla markaana la filayo inay sii socdaan.
Cabdiraxmaan Cabdishakuur ayaa sidoo kale sheegay in mucaaradku weli ku taagan yahay mowqifkiisa ku aaddan sharciyadda hay’adaha dowladda federaalka, isagoo ku dooday in muddadii dowladda ay dhammaatay.
Waxa uu xusay in mucaaradku ay la kulmeen xubno ka tirsan beesha caalamka, oo ay ku jiraan wakiillo qeyb ka ah dadaallada ay wadaan Mareykanka, Ingiriiska, Midowga Yurub iyo Qaramada Midoobay, kuwaas oo uu sheegay inay daneynayaan xasilloonida siyaasadeed ee Soomaaliya.