Muqdisho (Dawan) – Siyaasiga mucaaradka ah ahna musharraxa madaxweynaha Soomaaliya, Cabdiraxmaan Cabdishakuur Warsame, ayaa sheegay in mucaaradku diiday qorshe lagu soo jeediyay in mudaharaadyada lagu qabto garoomada ciyaaraha, isagoo arrintaas ku sababeeyay walaac amni iyo cabsi laga qabo in lagu dhex abuuro fowdo.
Cabdiraxmaan, oo ka hadlayay Miizaan Podcast ee ka baxa Dawan Media, ayaa sheegay in mucaaradku uu dalbanayo in loo oggolaado mudaharaad socod ah, maadaama uu yahay xuquuq uu dammaanad qaaday dastuurka dalka.
“Waxaan dalbanaynay waa mudaharaad socod ah,” ayuu yiri.
Wuxuu sheegay in mudaharaadka socodka ahi u baahan yahay oo keliya in dowladda la wargeliyo si ay u sugto amniga, halkii lagu xaddidi lahaa goobo cayiman sida garoomada ciyaaraha.
