Qaahira (Dawan)– Soomaaliya ayaa ku guul darreysatay ka qeybgalka isreeb-reebka Tartanka Kubadda Kolayga Afrika ee ciyaartoyda ka yar 18 jirka (U18 AfroBasket), Qaybta 5-aad ee Bariga Afrika, inkastoo ciyaartoydii loo diyaariyay inay dalka ku matalaan ay gaareen magaalada Qaahira ee dalka Masar.
Tartanka, oo uu maamulo Xiriirka Caalamiga ah ee Kubadda Kolayga (FIBA), ayaa lagu qabtay Qaahira intii u dhexeysay 23-ka iyo 29-ka Luulyo, wuxuuna ahaa isreeb-reeb loogu tartamayay hal boos oo lagu gaarayo Tartanka Afrika ee U18-ka, kaas oo lagu qaban doono magaalada Abidjan ee dalka Côte d’Ivoire.
Tartanka ayaa markii hore loo qorsheeyay magaalada Kampala ee Uganda, balse FIBA ayaa u wareejisay Qaahira. Soomaaliya waxay ku jirtay liiskii hore ee xulalka wiilasha ee la filayay inay ka qeybgalaan, hase yeeshee markii tartanku billowday waxaa ka qeybgalay lix xul oo keliya: Masar, Rwanda, Uganda, Koonfurta Suudaan, Kenya iyo Tanzania. FIBA ma shaacin sababta rasmiga ah ee Soomaaliya uga maqneyd tartanka.
Cabdullaahi Cabdulle Xasan, oo loo yaqaan Dhaqale, ayaa u sheegay Dawan in dhinaciisu soo xulay isla markaana diyaariyay ciyaartoy Soomaaliyeed oo dibadda ku nool si ay Soomaaliya ugu matalaan tartanka. Sida uu sheegay, dhammaan ciyaartoydaasi waxay haysteen dhalashooyin iyo baasaboorro dalal kale, kuwaas oo ay ku gaareen Masar.
Hase yeeshee, Dhaqane ayaa sheegay in ciyaartoydu aysan helin dhammaystirka habraacyadii looga baahnaa si ay Soomaaliya ugu metelaan tartanka, gaar ahaan helitaanka baasaboorrada Soomaaliya iyo dhammaystirka diiwaangelinta FIBA.
Wuxuu sheegay in waalidiinta ciyaartoyda ay bixiyeen ku dhowaad $3,000, halka xiriirku uu bixiyay $1,560 oo la xiriirtay baasaboorrada iyo diyaargarowga safarka.
