Beijing (Dawan)— Shiinaha ayaa Somaliland uga digay xiriirka ay la leedahay Taiwan, isagoo sheegay in ka gudbidda waxa uu ugu yeeray xadka arrinta Taiwan ay horseedi karto “cawaaqib xun.” Digniinta ayaa timid Arbacadaan maanta ah kadib markii Madaxweynaha Somaliland, Cabdiraxmaan Maxamed Cabdillaahi Cirro, uu sheegay in Beijing ay farriimo diblomaasiyadeed ugu gudbisay Somaliland oo ku saabsan xiriirka ay la leedahay Taiwan.
Cirro ayaa hadalkaas Isniintii ka sheegay wareysi uu siiyay Machadka Hudson ee Washington. Waxa uu sheegay in Shiinuhu kala hadlay arrinta Taiwan madaxweynihii isaga ka horreeyay, Muuse Biixi Cabdi, balse aanu aqbalin dalabka Beijing. Cirro ayaa sheegay inuusan si toos ah ula hadlin Madaxweynaha Shiinaha Xi Jinping, balse farriimo loo soo mariyay kanaallo diblomaasiyadeed. Sida uu sheegay, Beijing ay doonaysaa inay joogto Hargeysa, balse Taiwan ay baxdo.
Cirro ayaa sheegay in Somaliland ay diyaar u tahay inay martigeliso labada dhinac, isagoo tusaale u soo qaatay Washington, halkaas oo Shiinaha iyo Taiwan ay labaduba ku leeyihiin wakiillo, inkastoo Mareykanku xiriir diblomaasiyadeed rasmi ah la leeyahay Beijing oo keliya.
