Addis Ababa (Dawan)— Itoobiya ayaa war ay soo saartay ku adkaysay doorka iyo danaha ay ku leedahay Wabiga Nile iyo Badda Cas, iyadoo sheegtay in xiriirkeeda juqraafi iyo taariikheed lala xisaabtamo marka laga hadlayo maamulka biyaha iyo amniga badeed ee gobolka. Bayaan ay soo saartay ayay Addis Ababa ku sheegtay in Wabiga Abay, oo loo yaqaan Blue Nile, uu inta badan ka soo burqado dhulka buuraleyda ah ee Itoobiya, isla markaana uu bixiyo ku dhowaad 85 boqolkiiba qulqulka guud ee Wabiga Nile.
Itoobiya waxay sidoo kale carrabka ku adkaysay xiriirka ay muddo dheer la lahayd Badda Cas, iyadoo sheegtay in xuduuddeeda ugu dhow xeebta ay wax ka yar 30 mayl u jirto. Addis Ababa ayaa ka digtay in hadallo siyaasadeed, cadaadis, tallaabooyin loo maro wakiillo ama falal gardarro ah aysan waxba ka beddeli doonin waxa ay ku tilmaantay “xaqiiqooyinka aasaasiga ah” iyo danaha ay gobolka ka leedahay.
