Jabuuti (Dawan ) – Urur Goboleedka IGAD ayaa ku baaqay in la sii wado wada-hadallada siyaasadeed ee Soomaaliya kadib wadatashiyadii ka dhacay Muqdisho ee u dhexeeyay Dowladda Federaalka Soomaaliya iyo dhinacyada mucaaradka.
Bayaan kasoo baxay Sabtidii Xoghaynta IGAD ayaa lagu sheegay in ururku si hoose ula socday natiijada wadatashiyadii ka dhacay Muqdisho intii u dhexeysay 13-ka ilaa 15-ka May ee dhexmaray dowladda federaalka iyo siyaasiyiinta mucaaradka.
IGAD ayaa soo dhaweysay waxa ay ku tilmaantay wada-xaajoodka tooska ah ee dhinacyada, iyadoo ku dhiirrigelisay inay sii wadaan wada-hadalka si wax looga qabto arrimaha siyaasadeed ee taagan “si wax dhisaya oo loo dhan yahay.”
Ururka ayaa sheegay in sii socoshada wada-xaajoodka siyaasadeed ay muhiim u tahay ilaalinta xasilloonida Soomaaliya, xoojinta dowlad-dhiska iyo horumarinta nidaamka dimuqraadiyadda.
