Ankara (Dawan) – Dowladda Turkiga ayaa Soomaaliya ugu hambalyeysay munaasabadda Maalinta Qaranka ee 1-da Luulyo, iyadoo ku tilmaantay Soomaaliya “dal saaxiib iyo walaal ah”, isla markaana u rajeysay shacabka Soomaaliyeed munaasabad farxad leh.
War qoraal ah oo ka soo baxay Wasaaradda Arrimaha Dibadda Turkiga ayaa lagu sheegay in Ankara ay hambalyo u direyso Dowladda iyo shacabka Soomaaliyeed munaasabadda Maalinta Xornimada iyo Midnimada Soomaaliya.
“Waxaan Soomaaliyada aan saaxiibka iyo walaalka nahay gu hambalyeyneynaa munaasabadda Maalinta Qaranka,” ayaa lagu yiri bayaanka Wasaaradda Arrimaha Dibadda Turkiga.
Soomaaliya ayaa sanad kasta 1-da Luulyo u dabaaldegta Maalinta Qaranka, oo ku beegan xornimadii gobollada Koonfureed iyo midowgii Waqooyiga iyo Koonfurta Soomaaliya sanadkii 1960, taas oo saldhig u noqotay aas-aaska Jamhuuriyadda Soomaaliyeed.