Maxay tahay sababta xilka looga qaaday Guddoomiyihii Golaha Dhallinyarada Qaranka?

Muqdisho (Dawan) — Wasiirka Dhallinyarada iyo Ciyaaraha Soomaaliya, Maxamed Cabdulqaadir, ayaa beeniyay in xilka qaadista Guddoomiyihii Golaha Dhallinyarada Qaranka Soomaaliyeed, Maxamed Saciid “Champion”, ay sabab u ahayd dhaleeceyn uu u jeediyay siyaasadaha dowladda, isaga oo sheegay in go’aankaasi uu qayb ka yahay dib-u-habeyn lagu sameynayo hay’adda.

Wasiirka oo wareysi siiyay barnaamijka Miizaan Podcast ee Dawan Media ayaa sheegay in dib-u-habeynta Golaha Dhallinyarada Qaranka looga gol leeyahay in lagu horumariyo qaab-dhismeedka iyo habsami u socodka hay’adda, ayna ahayn tallaabo lagu bartilmaameedsanayo shaqsi gaar ah.

Hadallada wasiirka ayaa yimid kaddib markii wax laga weydiiyay xilka qaadista Maxamed Saciid “Champion”, oo dhacday kaddib khudbad uu 15-kii May kaga hadlay caqabadaha horyaalla dhalinyarada Soomaaliyeed, oo ay ka mid yihiin arrimo la xiriira fursadaha iyo xaaladda dhalinyarada.

Maxamed Cabdulqaadir ayaa sheegay in qodobadii lagu soo qaaday khudbaddaas ay horey si toos ah ugu gudbiyeen Madaxweynaha Jamhuuriyadda Federaalka Soomaaliya, Xasan Sheekh Maxamuud, intii uu socday kulan ay yeesheen hoggaamiyeyaal dhalinyaro ah oo ka socday ganacsatada Soomaaliyeed.

Wasiirka ayaa xusay in dowladda ay qaadday tallaabooyin lagu wajahayo cabashooyinka iyo caqabadaha ay soo gudbiyeen dhalinyarada, isaga oo ku adkeeyay in arrinta xilka qaadista aysan xiriir la lahayn hadalladii Guddoomiyihii hore.

“Arrintan wax xiriir ah lama laha hadalladii Guddoomiyihii Golaha. Anaga dowlad ahaan hadafka aan leenahay waa inaan dib-u-habeyn ku sameyno hay’adda, institution-ka in la reform gareeyo. Hay’addu waxay ku socotaa, shaqsi kuma socoto,” ayuu yiri wasiirka.

Wuxuu sheegay in Golaha Dhallinyarada Qaranka uu hadda ku jiro marxalad dib-u-habeyn ah oo lagu qeexayo qaabka hoggaanka iyo xubinnimada mustaqbalka, isaga oo tilmaamay in shaqsiyaadkii hore ay mar kale xilal ka qaban karaan haddii ay buuxiyaan shuruudaha iyo nidaamka cusub ee la dejinayo.

Wasiirka ayaa sidoo kale ku tilmaamay Maxamed Saciid “Champion” qof u soo adeegay Golaha Dhallinyarada Qaranka isla markaana la soo shaqeeyay wasaaradda, isagoo sheegay in isbeddelka hoggaanka uu ka dhashay baahida loo qabo dib-u-habeyn guud oo lagu hagaajinayo maamulka hay’adda.

Maxamed Cabdulqaadir ayaa intaas ku daray in dib-u-habeynta Golaha Dhallinyarada ay ku jiri doonaan la-tashiyo lala yeelanayo wakiillada dhalinyarada, mas’uuliyiinta dowladda iyo dhammaan dhinacyada ay khusayso, ka hor inta aan la ansixin qaab-dhismeedka cusub.

Doodda ku saabsan xilka qaadista Guddoomiyihii hore ee Golaha Dhallinyarada ayaa dhalatay kaddib markii la isweydiiyay in hadalladii uu kaga hadlay xaaladda dhalinyarada Soomaaliyeed ay sababeen go’aanka dowladda. Hase yeeshee, wasiirku wuxuu ku adkeystay in go’aankaasi ku saleysnaa dib-u-habeyn hay’adeed, uuna ahayn jawaab laga bixiyay dhaliilo loo jeediyay dowladda.