Maxay xukuumadda cusub ee Jabuuti ka shaqeyn doontaa 5-ta sano ee soo socota?

Jabuuti (Dawan ) – Madaxweynaha Ismaaciil Cumar Geelle ayaa xukuumaddiisa cusub u dejiyay jihada ay ku shaqeyn doonto shanta sano ee soo socota, isagoo mudnaanta koowaad siinaya horumar loo dhan yahay, warshadeyn, shaqo-abuur, tiknoolojiyad, iyo xoojinta adkeysiga dalka ee ka dhanka ah dhibaatooyinka caalamiga ah.

Madaxweyne Geelle ayaa arrimahan uga hadlay kulankii ugu horreeyay ee Golaha Wasiirrada cusub, kaddib doorashadii madaxtinnimada ee dhacday 10-kii April 2026, taas oo mar kale xilka loogu doortay.

Khudbaddiisa, Geelle wuxuu sheegay in kobaca dhaqaalaha uusan macno buuxa sameyn karin haddii uusan wax ka beddelin nolosha bulshada.

“Kobaca dhaqaale macno ma sameynayo haddii uusan isu beddelin horumar bulsho,” ayuu yiri Madaxweyne Geelle.

Madaxweynaha ayaa sheegay in Jabuuti ay u baahan tahay inay dardargeliso warshadeynta, isla markaana la dhiirrigeliyo hirgelinta xarumo wax-soo-saar, si kaabayaasha dekedaha iyo saadka dalka ay u taageeraan dhaqaale ku dhisan wax-soo-saar.

“Waa inaan dardargelinnaa warshadeynta dalkeenna. Waa inaan dhiirrigelinnaa dhismaha xarumo wax-soo-saar,” ayuu raciyay hdalkiisa

Geelle ayaa sidoo kale sheegay in dowladda ay taageeri doonto maalgashiga, gaar ahaan qeybaha abuuri kara hanti iyo shaqooyin badan. Wuxuu si gaar ah u xusay tiknoolojiyadda cusub, oo uu ku tilmaamay qeyb wax weyn ka beddeli karta dhaqaalaha, isla markaana shaqooyin cusub u abuuri karta dhalinyarada.

Dhanka adeegyada bulshada, Madaxweynaha Jabuuti wuxuu sheegay in xukuumaddiisu sii wadi doonto siyaasadaha horumarinta bulshada, gaar ahaan helitaanka adeegyada caafimaadka iyo waxbarashada.

Wuxuu sidoo kale sheegay in “wadajirka qaranka” uu sii ahaan doono tiir muhiim ah oo ka mid ah siyaasadda bulshada ee dowladda.

Madaxweyne Geelle ayaa wasiirradiisa uga digay saameynta dhibaatooyinka caalamiga ah, isagoo sheegay in qalalaasaha ka socda dunida ay cadaadis saari karaan dhaqaalaha, isla markaana ay saameyn ku yeelan karaan nolosha shacabka Jabuuti.

Madaxweynaha ayaa ku baaqay in la xoojiyo adkeysiga dalka, lana ilaaliyo jihada kobaca dhaqaalaha.

Qeybta ugu dambeysa ee khudbaddiisa, Geelle wuxuu wasiirradiisa faray inay ku shaqeeyaan wadajir, isku xirnaan iyo natiijooyin muuqda, isagoo ka digay xafiis-fadhiidnimo iyo habacsanaan.

Kulanka Golaha Wasiirrada cusub ayaa sidoo kale looga hadlay qodobo shaqo oo dhowr ah, waxaana ka qeyb galay dhammaan xubnaha cusub ee xukuumadda, oo ay ku jiraan wasiirro markii ugu horreysay ku soo biiray dowladda.