Washington (Dawan) — Maxkamadda Federaalka ee Degmada Massachusetts, Boston, ayaa maamulka Madaxweyne Donald Trump u oggolaatay inuu sii wado joojinta Xaaladda Ilaalinta Ku-meelgaarka ah (TPS) ee Soomaaliya, tallaabadaas oo saameyn karta ku dhowaad 1,100 Soomaali ah oo muddaba ku noolaa Mareykanka, iyagoo ka faa’iideysanayay ilaalinta ka dhanka ah masaafurinta.
Garsoore Allison Burroughs oo ka tirsan maxkamad federaal ah oo ku taalla Boston ayaa 14-kii Agoosto qaaday xannibaad hore u hakineysay qorshaha dowladda ee lagu soo afjarayo TPS-ka Soomaalida. Wakaaladda Wararka Reuters ayaa sheegtay in go’aankaasi uu maamulka u furayo waddo uu ku dhaqan-geliyo joojinta barnaamijka.
Hay’adda Adeegyada Jinsiyadda iyo Socdaalka Mareykanka (USCIS) ayaa xaqiijisay in TPS-ka Soomaaliya la joojiyay, iyadoo go’aanku dhaqan galay 14-kii Agoosto 2026. TPS waa barnaamij bani’aadannimo oo muwaadiniinta dalalka ay ka jiraan dagaallo, masiibooyin ama xaalado amni oo daran siinaya ilaalin ku-meel-gaar ah iyo oggolaansho shaqo.
Dowladda Mareykanka ayaa ku doodday in xaaladda Soomaaliya ay is beddeshay, isla markaana aysan mar dambe buuxin shuruudihii sharci ee lagu sii wadi lahaa TPS-ka, xilli Madaxweyne Trump uu dhowr jeer Soomaaliya ku dhaliilay in aysan ka jirin dowlad si hufan u shaqeysa.
