Boosaaso (Dawan) — Maxkamadda Darajada Koowaad ee Ciidamada Qalabka Sida iyo Dambiyada Culus ee Puntland ayaa dil toogasho ah ku xukuntay Cabdiqasim Cabdiraxmaan Cali, oo 20 jir ah, kaddib markii maxkamaddu ku heshay inuu dil u geystay marxuum Ibraahim Cismaan Jibriil oo ahaa 19 jir.
Maxkamadda oo fadhigeedu yahay magaalada Boosaaso ayaa sheegtay in xukunka lagu saleeyay caddeymaha ku jiray gal-dacwadeedka, qiraalka eedeysanaha, warqadda caddeynta dhimashada marxuumka iyo doodihii ay soo bandhigeen Xafiiska Xeer-ilaalinta iyo qareennada difaacayay eedeysanayaasha.
Sida ku cad xukunka maxkamadda, Cabdiqasim Cabdiraxmaan Cali ayaa lagu helay eedda ah inuu dilay Ibraahim Cismaan Jibriil 20-ka Abriil ee sanadkan, waxaana lagu xukumay dil toogasho ah oo ah qisaasta marxuumka.
