Midowga Afrika oo ku baaqay in dib loo bilaabo wada-hadallada siyaasadeed ee Soomaaliya

Addis Ababa (Dawan) – Midowga Afrika ayaa walaac ka muujiyay in wada-hadalladii u dhexeeyay Dowladda Federaalka Soomaaliya iyo Golaha Mustaqbalka Soomaaliya ay kusoo dhammaadeen iyadoo aan heshiis laga gaarin, sida lagu sheegay war-saxaafadeed kasoo baxay Midowga Afrika.

Wadahadalladan oo ka dhacay Muqdisho intii u dhexeysay 13-ka ilaa 15-ka May 2026 ayaa diiradda lagu saarayay khilaafaadka siyaasadeed iyo arrimaha doorashooyinka Soomaaliya.

Midowga Afrika ayaa bogaadiyay diyaar garowga ay muujiyeen Dowladda Federaalka Soomaaliya oo uu hoggaaminayo Madaxweyne Xasan Sheekh Maxamuud iyo hoggaanka mucaaradka si ay uga qeyb qaataan wada-hadal toos ah oo loo dhan yahay.

“Guddigu wuxuu bogaadinayaa rabitaanka Dowladda Federaalka iyo hoggaanka mucaaradka ee ku aaddan wada-hadal toos ah oo loo dhan yahay, si loo ilaaliyo danta Soomaaliya iyo shacabka Soomaaliyeed,” ayaa lagu yiri war-saxaafadeedka.

Guddiga Midowga Afrika ayaa sidoo kale ka digay sii xoogeysiga kala aragti duwanaanta siyaasadeed, isagoo ugu baaqay dhammaan dhinacyada inay si degdeg ah dib ugu laabtaan wada-hadal siyaasadeed oo dhab ah.

“Midowga Afrika wuxuu ugu baaqayaa dhammaan dhinacyada siyaasadda inay dib uga go’naadaan wada-hadal loo dhan yahay oo ku dhisan wada-xaajood dhab ah, is-afgarad iyo ixtiraamka nidaamka dastuuriga ah,” ayaa lagu yiri bayaanka.

Midowga Afrika ayaa sidoo kale xaqiijiyay sida ay uga go’an tahay sii wadista howlgalka iyo waajibaadka uu ka hayo Soomaaliya, oo ay ku jirto taageerada howlgalka AUSSOM.

Bayaanka ayaa sidoo kale lagu bogaadiyay kaalinta Qaramada Midoobay, Midowga Afrika iyo saaxiibada caalamiga ah ee ku aaddan fududeynta wada-hadallada iyo dadaallada lagu yaraynayo khilaafaadka siyaasadeed ee Soomaaliya.