Luanda (Dawan) — Guddoomiyaha Guddiga Midowga Afrika Maxamuud Cali Yuusuf ayaa Soomaaliya ku daray dalalka Afrika ee wajahaya colaado iyo xiisado amni oo daba dheeraaday, isagoo ku baaqay in la xoojiyo hababka qaaradda ee looga hortago laguna xalliyo khilaafaadka.
Isagoo ka hadlayay Kalfadhiga 21-aad ee aan caadiga ahayn ee Golaha Midowga Afrika oo Axaddii ka dhacay magaalada Luanda ee dalka Angola, Maxamuud ayaa sheegay in Afrika ay u baahan tahay dib-u-habayn lagu sameeyo qaab-dhismeedka nabadda iyo amniga si qaaraddu si wanaagsan uga jawaabto khataraha jira iyo kuwa soo baxaya.
Wuxuu sheegay in Suudaan, bariga Jamhuuriyadda Dimuqraadiga ah ee Congo, Soomaaliya, Saaxilka, Liibiya, waqooyiga Mozambique iyo Madagascar ay ka mid yihiin goobaha qaaradda ee wajahaya colaado daba dheeraaday iyo xiisado walaac leh, sida lagu sheegay khudbaddiisa oo lagu daabacay bogga rasmiga ah ee Midowga Afrika.
Guddoomiyaha ayaa sheegay in khataraha soo baxaya ee ay ka mid yihiin argagixisada, xagjirnimada rabshadaha wata, burcad-badeedda iyo tacaddiyada loo geysto muhaajiriinta ay qayb ka yihiin caqabadaha amni ee qaaradda.
Wuxuu sidoo kale sheegay in dambiyada xuduudaha ka gudba iyo tartanka juqraafi-siyaasadeed ee caalamku ay sii xoojinayaan dhibaatooyinka Afrika.
Maxamuud Cali Yuusuf ayaa ku baaqay in la xoojiyo nidaamka digniinta hore ee qaaradda, isagoo sheegay in ka-hortagga colaadaha uu weli yahay mid ka mid ah meelaha ugu liita ee dadaallada Afrika ee nabadda iyo amniga.
Wuxuu sidoo kale ku baaqay in si wanaagsan loo hirgeliyo go’aannada ay qaataan hay’adaha Midowga Afrika, isagoo sheegay in qaab-dhismeedka nabadda iyo amniga qaaraddu u baahan yahay dib-u-eegis qoto dheer.
