Addis Ababa (Dawan) – Midowga Afrika ayaa walaac ka muujiyay xaaladda siyaasadeed ee ka taagan dalka Venezuela, kadib weerarkii ay Ciidamada Mareykanka kusoo qabteen Madaxweyne Nicolás Maduro iyo weerarradi ay ku bartilmaameedsadeen hay’adaha rasmiga ah ee dowladda.
War-saxaafadeed ka soo baxay Midowga Afrika ayaa lagu adkeeyay sida ay uga go’an tahay ilaalinta mabda’a aasaasiga ah ee sharciga caalamiga ah, gaar ahaan ixtiraamka madax-bannaanida waddamada, midnimada dhuleed, iyo xaqa dadka ee is-maamulida, sida ku xusan Dastuurka Qaramada Midoobay.
Bayaanka ayaa sidoo kale xusay muhiimadda wadahadalka iyo xallinta khilaafaadka si nabad ah, iyadoo la ixtiraamayo qaab-dhismeedka dastuuriga iyo hay’adaha dowladda, laguna dhaqmayo iskaashi, iyo wada noolaansho nabdoon oo dhex marta waddamada.
