Muqdisho (Dawan) – Xildhibaan Maxamed Abuukar Islow oo ka tirsan Midowga Haybad Qaran ayaa si adag uga horyimid soo jeedinta Golaha Mustaqbalka Soomaaliyeed ee lagu dalbaday in Soomaaliya loo dhiso Gole Kumeelgaar ah oo beddela hay’adaha dowladda, isagoo ku tilmaamay qorshahaas mid dib u celin kara dalka.
Xildhibaanka ayaa sheegay in haddii qoraalka Golaha Mustaqbalka uu sax yahay, ay tahay arrin laga xumaado in siyaasiyiin mustaqbal ka leh hoggaaminta dalka ay taageeraan qorshe dib loogu celinayo Soomaaliya marxaladdii kumeelgaarka ahayd.
“Haddii qoraalkaasi sax yahay, waa wax aad looga xumaado inay maanta jiraan dad mustaqbal ka leh hoggaaminta dalka oo doonaya in Soomaaliya dib loogu celiyo kumeelgaarnimo,” ayuu yiri Xildhibaan Maxamed Abuukar Islow.
Hadalkan ayaa bannaanka soo dhigay khilaaf siyaasadeed oo ka dhex muuqda dhinacyada mucaaradka ee ku mideysan Golaha Mustaqbalka Soomaaliyeed. Midowga Haybad Qaran ayaa qayb ka ah Golaha Samatabixinta, kaas oo isaguna ka tirsan Golaha Mustaqbalka ee soo saaray warqadda muranka dhalisay.
Warqadda furan ayaa loo diray dalalka ciidamada ku deeqay Hawlgalka Midowga Afrika ee Taageerada iyo Xasillinta Soomaaliya (AUSSOM), iyadoo ku soo beegantay furitaanka shirka Kampala ee looga hadlayo arrimaha Soomaaliya. Golaha Mustaqbalka ayaa ku dooday in muddo-xileedka dowladda Federaalka uu dhammaaday, sidaas darteedna loo baahan yahay hannaan ku meel gaar ah.
