Midowga Yurub oo ka qaaday Itoobiya xayiraadihii Fiisaha Schengen

Brussels (Dawan )– Golaha Midowga Yurub ayaa Talaadadii sheegay inuu go’aansaday in la joojiyo xayiraadihii fiisaha Schengen ee lagu soo rogay muwaadiniinta Itoobiya sanadkii 2024, isagoo sabab uga dhigay waxa uu ku tilmaamay horumar laga sameeyay iskaashiga Itoobiya ee aqoonsiga iyo dib u celinta muwaadiniinteeda sida sharci darrada ah ugu sugan dalalka xubnaha ka ah Midowga Yurub.

Sida lagu sheegay bayaan ka soo baxay Golaha Midowga Yurub, go’aan la ansixiyay 18-kii May ayaa baabi’inaya tallaabooyinkii hakiyay qaybo ka mid ah Xeerka Fiisaha Midowga Yurub ee quseeyay muwaadiniinta Itoobiya, kuwaas oo lagu doonayay in lagu dhiirrigeliyo iskaashi xooggan oo ku saabsan arrimaha dib u celinta.

Xayiraadahaas ayaa la soo rogay kadib markii Midowga Yurub uu sanadkii 2022 ku qiimeeyay in iskaashiga Itoobiya ee habraacyada dib u celinta aanu ku filnayn, isla markaana loo baahnaa horumar muuqda oo ku saabsan aqoonsiga muwaadiniinta Itoobiya, bixinta dukumentiyada safarka iyo abaabulka hawlgallada dib u celinta.

Golaha Midowga Yurub ayaa sheegay in qiimeyn dambe oo uu sameysay Guddiga Yurub lagu ogaaday “horumar la taaban karo oo joogto ah” oo dhinaca iskaashiga ah, gaar ahaan aqoonsiga muwaadiniinta Itoobiya ee si sharci darro ah ugu sugan dalalka Yurub, bixinta dukumentiyada safarka degdegga ah iyo fududeynta hawlgallada dib u celinta.

Markii la hirgeliyay tallaabooyinkii 2024, muwaadiniinta Itoobiya ma aysan heli karin qaar ka mid ah fududeymaha fiisaha, oo ay ku jireen shuruudo dukumentiyo oo la fududeeyay, ka dhaafitaan lacagta fiisaha ee dadka sita baasaboorrada diblomaasiga iyo adeegga, muddada gaaban ee lagu farsameeyo codsiyada fiisaha iyo helitaanka fiisooyin gelitaan badan leh, sida ku cad dukumentiyada Midowga Yurub.

Golaha Midowga Yurub ayaa sheegay in xayiraadahaas hadda la qaadayo, taasoo dib u soo celinaysa adeegsiga caadiga ah ee nidaamka fiisaha Schengen ee muwaadiniinta Itoobiya. Go’aanka ayaa dhaqan geli doona marka si rasmi ah loogu wargeliyo dalalka xubnaha ka ah Midowga Yurub.

Sida uu dhigayo Xeerka Fiisaha Midowga Yurub, Guddiga Yurub ayaa si joogto ah u qiimeeya heerka iskaashiga dalalka aan xubnaha ka ahayn Midowga Yurub ee la xiriira dib u celinta muwaadiniintooda. Qiimeyntaasi waxay horseedi kartaa in la soo rogo ama la qaado tallaabooyin la xiriira fiisaha iyadoo lagu saleynayo heerka iskaashiga, sida uu sheegay Golaha Midowga Yurub.

Go’aankan ayaa dib u soo celinaya adeegsiga buuxa ee qodobbadii fiisaha Schengen ee laga hakiyay Itoobiya sanadkii 2024 si loogu dhiirrigeliyo iskaashi dheeraad ah oo ku saabsan arrimaha dib u celinta muwaadiniinta.