Brussels, 27 Diseembar 2025 (Dawan)— Midowga Yurub ayaa xaqiijiyay taageeradiisa midnimada, madaxbannaanida iyo wadajirka dhuleed ee Jamhuuriyadda Federaalka Soomaaliya, kaddib tallaabadii ay Israa’iil ku aqoonsatay Somaliland inay tahay dowlad madax-bannaan.
Bayaan ay soo saartay Waaxda Arrimaha Dibadda ee Midowga Yurub ayaa lagu adkeeyay “muhiimadda ay leedahay in la ixtiraamo midnimada, madaxbannaanida iyo wadajirka dhuleed ee Jamhuuriyadda Federaalka Soomaaliya, sida ku xusan dastuurkeeda, axdiyada Midowga Afrika iyo Qaramada Midoobay.”
Midowga Yurub wuxuu tilmaamay in mabda’aani uu yahay tiir muhiim u ah nabadda iyo xasilloonida guud ahaan gobolka Geeska Afrika.
