Muqdisho (Dawan)– Iyadoo ay sii xoogeysanayso xiisadda diblomaasiyadeed ee ka dhalatay aqoonsiga Israa’iil ee Somaliland, ayaa mucaaradka siyaasadeed ee Muqdisho bilaabay in ay arrintan u adeegsadaan xoojinta doodda ku saabsan hannaanka doorashooyinka dalka.
War-saxaafadeed ay soo saartay Madasha Samata-bixinta Soomaaliyeed ayaa lagu muujiyay walaac xooggan oo la xiriira waxa ay ku tilmaameen khatar qaran oo ka dhalan karta isku-dayo lagu kala qaybinayo dalka, iyadoo si dadban loo dhaliilay jihada ay wax u waddo dowladda hadda jirta, gaar ahaan dhinacyada la xiriira doorashooyinka.
Madashu waxay ku baaqday in la helo hannaan doorasho oo ku dhisan wadar-ogol iyo is-afgarad siyaasadeed.
Madashu waxay sheegtay in kulamo wadatashi ah oo ay la yeesheen Madaxweynaha, Ra’iisul Wasaaraha iyo xubno ka tirsan Golaha Wasiirrada ay diiradda saareen sidii looga hortagi lahaa kala-qaybsanaan siyaasadeed iyo mid qaran.
