Muqdisho (Dawan) — Siyaasiyiinta mucaaradka ayaa maanta shir jaraa’id ku qabtay Muqdisho, iyaga oo ku dhawaaqay waqtiga iyo goobaha uu ka dhici doono bannaanbaxa ay ku baaqeen maalinta berri.
Siyaasiyiinta oo la hadlay warbaahinta ayaa sheegay in bannaanbaxu uu bilaaban doono aroornimada Axadda saacadda marka ay ku beegnatahy 7:00 subaxnimo, isla markaana laga qaban doono dhammaan degmooyinka gobolka Banaadir.
Hoggaamiyeyaasha mucaaradka ayaa sheegay in bannaanbaxu aanu ku ekaan doonin hal maalin, balse uu sii socon doono ilaa dadka cabanaya ay helaan xuquudooda muwaadinimo.
“Bannaanbaxu waa berri, waa toddobada subaxnimo. Bannaanbax berri kaliya ah ma aha; marka uu billowdo, inta qof walba uu xuquuqdiisa helayo wuu soconayaa,” ayuu yiri Ra’iisul Wasaarihii hore ee Soomaaliya, Xasan Cali Kheyre.
Mucaaradka ayaa sheegay in ujeeddada bannaanbaxu ay tahay in cadaalad loo raadiyo bulshada ka cabanaysa arrimaha dhulka. Waxay sidoo kale ku baaqeen in isu soo baxa uu noqdo mid nabadeed, iyaga oo ka digay falal horseedi kara caburin ama rabshado.
