Muqdisho ( Dawan) – Qaramada Midoobay iyo Dowladda Ingiriiska ayaa ugu baaqay hoggaamiyeyaasha mucaaradka Soomaaliya inay ka qeybqaataan madasha wadatashi qaran ee ay ku dhawaaqday Dowladda Federaalka Soomaaliya, iyagoo adkeeyay muhiimadda wada-hadal loo dhan yahay si loo gaaro is-afgarad ballaaran oo ku saabsan hannaanka doorashooyinka ka hor dhammaadka muddada dastuuriga ah ee hay’adaha dalka.
Hawlgalka Qaramada Midoobay ee Kaalmeynta Xilliga Kala-guurka ee Soomaaliya (UNTMIS) ayaa Arbacadii soo dhoweeyay ku dhawaaqista dowladda ee madal wadatashi qaran iyo casuumaadda loo fidiyay Golaha Mustaqbalka Soomaaliya, oo ah isbahaysi mucaarad oo saameyn ku leh siyaasadda dalka.
UNTMIS ayaa sheegtay inay si buuxda u taageerayso dadaallada lagu doonayo in lagu gaaro wada-hadal loo dhan yahay oo horseeda is-afgarad ballaaran oo ku saabsan doorashooyin hufan, loo dhan yahay, isla markaana lagu qabto waqtigooda. “Waxaan mar kale xaqiijinaynaa taageeradeenna wada-hadal loo dhan yahay oo lagu gaari karo is-afgarad ballaaran oo ku saabsan doorashooyin hufan ka hor inta aysan dhammaan muddada dastuuriga ah ee hay’adaha,” ayaa lagu yiri bayaan ay UNTMIS ku baahisay barta X.
Howlgalka ayaa kudhiirrigelisyay Golaha Mustaqbalka Soomaaliya inay si togan uga jawaabaan casuumaadda dowladda, iyaga oo ay muhiim tahay in dhammaan dhinacyada siyaasadda ay si wax ku ool ah uga qeybqaataan wada-hadallada la qorsheeyay.
